Texte

BITTE SUACH DA NIX AUS

Bitte suach da nix aus,
enstscheidst di eh imma fias gleiche
moch ma scho laung nix mehr draus,
du sogst du suachst, doch findst nia s’neiche.

Bleib do oafoch wosd bist
dazö da söba deine Sorgen,
bitte ghoid da dein Mist
wonnst moxd, i kaunn da mein a borgn.

Loss di doch oafoch moi finden
von dein leben, vo da Wöt
renn net nur vorn, bleib amoi hintn,
sonst siachst jo nia wos da föht.

Und oft kimm ausn nix donn
wos daher, wosd net kennst.
Nua woasst vorher hoid net wonn,
und scho goa net wonnst rennst.

Meist is des wos gaunz neiches
hätts da nia denkn traut
Weil denkn kaunnst du nur gleiches,
oda nur wos gleich ausschaut.

Bitte suach da nix aus,
enstscheidst di eh imma fias gleiche
moch ma scho laung nix mehr draus,
du sogst du suachst, doch findst nia s’neiche.

Bleib do oafoch wosd bist
dazö da söba deine Sorgen,
bitte ghoid da dein Mist
wonnst moxd, i kaunn da mein a borgn.

I KENN MI AUS

Jo schon seit Johren hob i a speziells Talent
es is oft hoat, i woass, doch i kaun nur a so
und de Leit wissns scho, weil mi fost jeda kennt.
Net olle megn mi, weil i sie moch sötn froh.

I kenn die Auntwortn scho laung bevors de Frogn gibt,
do is den meistn ihr Problem nu net bewusst.
I hob de Fähigkeit vo kloa auf Tog und Nocht gübt,
jojo, Probleme aundrer lösn löst mein Frust.

Doch wonns um mi geht san de Lösungen verschwundn
weil do versagt mei Gobe völlig, des is gwiss.
Statt ana Lösung hob i oft Probleme gfundn,
ihr weats vasteh, dass des für mi ungünstig is.

Dazöt ma wer wos über seine Gemütslage,
versuacht mei Hirn bereits die Lösungen zu sehn.
Statt dass i zuahea quält mi söbst so maunche Frage,
und i fühl mi gaunz außerstande zu verstehn.

Kann doch net sei dass des so bleibt, do gheat wos gändert,
des mocht mi unruhig, i mog höfn gaunz ungfrogt.
Doch wünscht si mei Gegnüber nur, dass i vasteh tat,
sie findt, dass maunchmoi nix gheat gändert, es gheat gsogt.

Doch wonns um mi geht san de Lösungen verschwundn
weil do versagt mei Gobe völlig, des is gwiss.
Statt ana Lösung hob i oft Probleme gfundn,
ihr weats vasteh, dass des für mi ungünstig is.

Und i woaß heit, dass do dahinter steckt a Grund a
warum der ungefragte Ratschlag mich bedrängt.
Wonn olle rund um mi sie ändern, durch a Wunda,
dann brauchat i nix lernen, i kriagat ois gschenkt.

Und koana wuat mi konfrontiern mit meine Föhla,
weil olle nemman mi a so, wia i grod bin.
Nur i alloa mog mi nu net, geht hoid net schnölla,
weil kümmern um mi hot fia mi hoid gmocht koan Sinn.

Und wonns um mi geht san de Lösungen verschwundn
weil do versagt mei Gobe völlig, des is gwiss.
Statt ana Lösung hob i oft Probleme gfundn,
ihr weats vasteh, dass des für mi ungünstig is.

IM FRÜHLING

Im Frühling, geh i so gean spaziern;
geh gern alloa, jedoch zu zweit warads a schee,
do mecht i goa net liagn.

Im Frühling, do wirds laut, übaroi Bienen, sum sum
und olles is im Soft,
net nur de Vögln vögnl umadum

Im Frühling, wolln si olle vermehrn,
sie brotn ständig übaroi eini,
des kaunnst du ollerorts hean.

Im Frühling, hot ma Gefühle wia des gaunze Joah net
do spün so einige varruckt,
des is für maunche echt bled.

Im Frühling, do boizt jeda wos nur geht,
do glaubst, wonns heit net passiert,
donn is sowieso eh scho zspät.

Im Frühling, kimmt ma drauf, dass da Winterspeck nu do is, oba da Winter scho nimma,
und wonn ma gaunz genau hinschaut,
wirds mit jedn Joah nu a weng schlimmer.

Im Frühling, hoff ma oft drauf dass besser wird,
wias im letztn Winter is gwesn,
und dass des Lebn neich aufbliaht.

Doch a im Frühling, hängt des bessa werdn vo mia o,
bin i mutig und riskier wos neichs,
donn spüt si si richtig o.

Im 2. Frühling, gehts meistns nimma so leicht wia beim ersten moi.
Doch trotzdem hot des nur gaunz sötn a wen obghoidn,
des is meist net da Foi.

Doch es tuat vielleicht beim Vergleich mit friah weh.
Du kaunnst sie drahn und windn wia du mechst,
ohne Hüfe bleibt  a nimma so gern steh.

SCHULGEDANKEN

Jo oans und oans, des is zwa
und wonn i wos ausloss, donn foits owe
dass de Wöt rund is, woaß i a
fia d’Suppn nimmst Löffel, und net de Gobe

Und im Woid, do stengan Bam,
und des Meer is volla Wossa
doch i wohn nua, bin net daham
und Aungst mocht kraunk, und da Hoss a

Doch i woass oft net, wer i bin
und i hob Aungst vor meine Föhla
wonn des Schulgeh hätt mehr Sinn,
vagangat de Zeit jo vü schnölla

Des Integrian, des is uns zschwa
wir seng vü liaba Differenzn
und stundn sitzn, lern ma a
de Schul is wirklich nua zum Schwänzn

Des wos i Denk, intressiat neamt
aussa i hobs vom  Lehra übanumma
dass fia a Prüfung koana schwärmt
is jo nix neichs, und wo bleibt da Summa

Doch i woass oft net, wer i bin
und i hob Aungst vor meine Föhla
wonn des Schulgeh hätt mehr Sinn,
vagangat de Zeit jo vü schnölla

Und Kurven diskutier ma scho seit Stunden
oba net weibliche, des is da Schaß
hob vü Ideen, nua koa Lösung gfundn
wos ma beim Lerna ogeht is da Spaß.

Des wos ma Freid mocht, geht fost vo alloane
aunscheinend güts nix, wonn ma si net plogt
Verwendung fia des meiste hob i koane
nur leider wird ma do net gfrogt.

Doch i woass oft net, wer i bin
und i hob Aungst vor meine Föhla
wonn des Schulgeh hätt mehr Sinn,
vagangat de Zeit jo vü schnölla

Von oim wos i so glernt hob is vü weg
weil i’s bis heite echt net brauchn kau
und des Hirn löscht zum Glick den meisten Dreck,
wonn i wos brauch schau i mas hoid DONN AU!

Des brauchst donn späta , sogns donn, wirst scho segn.
Des späta is bis heit hoid nu net kemma
und i woass, Schulgeh hob i echt net megn
würd ma gern 13 Joah Zeitausgleich nemma.

Doch i möcht wissn wer i bin
aum bestn lernt ma jo durch Föhla
so hat des Lebn erscht an Sinn
wonn ma oft blickt übern Raund vom Tölla.

WÄHRENDN AUTOFOAHN TIPPN

Neulich sitz i im Auto ruaft mei Freindin mi au
ob i net fia sie schnö wos im internet schauen kau.
Und weil i goa nia gleant hob oafoch NA-sogn wonns gheat,
hob beim Foan i im Handy schnö wos tippt, unbeschwert.

Weil mein Schatz i jo gean jeden Gfoin tua, wo’s geht
hob in dem konkretn Foi i d’Stroß valossn, echt bled.
Und unsa gemeinsaumes Auto des wos woa eascht a Joah
gegn an Birnbaum geparkt, des woa bled, wirkli woa.

Und wia i mei Freindin donn auruaf, sogt sie echt, gaunz ehrlich:
Währendn Autofoan tippn is total gefährlich.

Daraufhin woa a poa Wochn de Stimmung eher mies,
is a irgendwie kloa, weils aufs Auto aungwiesn is.
Und drum hobn uns ihre Eltern ihr Zweitauto geborgt,
mir hobn die Unfallursoch net erzöht, des hätt sie gesorgt.

Wie gsogt de Stimmung woa untn, über mehrere Wochn
und donn plötzlich is wieder Verliebtheit ausgebrochn.
Fost so schee wia am Anfang woas fia uns olle beide,
mia hobn si Nochrichtn gschickt, wie frisch valiebt, voller Freude.

Und so hob i mi donn, weil i so valiebt woa,
auf da Stroß hinreißn lossn und hob wos gschriem, is jo kloa.
Weil des kaunn nimma woatn, hob i docht, es is so herrlich,
Währendn Autofoan tippn is total gefährlich.

Is ma donn grod nu eigfoin wia der Lostwogn vor mia
plötzlich goa nimma gfoan is, er woa voiglodn mit Bier.
Und so bin i mit Schwung hintn untn einigfoan,
des woa net so guad wias klingt, des brauchts jetzt goa net moan.

Und wos i jetzt jednfois glernt hob, i sog eichs, gaunz ehrlich,
Währendn Autofoan tippn is total gefährlich.

Und 2 Autos in zwoa Monat, des is echt net weng
und sovü Pech in kurzer Zeit des hob i nu sötn gseng.
Zum Glück hot de Vollkasko zumindest unsan Wogn ersetzt,
weils vom SMS nix gwisst hobn, es hod hoid koana petzt.

I hob a Glück ghobt weil so richtig schwervaletzt woa i nia,
oamoi a brochena Finger, donn a richtig blaus Knia
doch wos aum meistn wehtau hot des woa der Blick der zwoa Fraun,
meiner verärgertn Freindin und ihrer Mam in’d Augn schaun.

I hob mei leben laung nu nia so konzentriert erlebt,
wia Blicke tötn kenntn und ma glaubt de Erde bebt.
Und wiast di innahoib Sekundn fühlst wia a Bua mit 5 Joah,
zwoa bestrofende Mütter, des ist hoat, wiakli woa.

Und des bittare drau is dass war mei Freindin net gwesn,
i hätt jo beim Foan net tippt oda a SMS glesn.
Und i hätt den gaunzn Schmerz mir seelisch und körpalich gspoat,
i woass jetzt, dass ma nix tippt wonn ma mitn Auto foat.

Weil des gaunze Handy klumpat is total entbehrlich,
und währendn Autofoan tippn is total gefährlich.

NET AMOLL

Net amoll, hob i glaubt dass i woaß wias jetzt bessa geh kunnt.
Doch leider is de Wöt koa Scheibn, sogns, na sie is tatsächlich rund.

Net amoll, woa i ma sicha dass i jetzt endlich glernt hob wias geht,
und dass ois bessa wird ois bisher, de Erkenntnis kummt eigentlich imma zu spät.

Net amoll, woa i ma sicher es genügt wonn is oafoch aundas moch,
und sonst brauch i goa nix ändern, de Idee woa net schwoch.

Do wonns so, leicht war hätt i des scho vü friah moi probiert,
weil i beim tuan jetzt gmerkt hob, wos ma beim aundas mochn ois bliaht.

Weil olles, wos bis duathi i woa , des is zum Vorschein kemma,
des muasst eascht moi megn und den Nerv hobn, di mit oll dem aunemma.

Weil net amoi, ho i do seitn vo mir kenna glernt de i vorher net hob gsegn
und gaunz ehrlich, seavü davo hob i sicha net, glei vo aunfaung a megn.

Doch des mocht nix, weil des Leben bringt da ois solaung wieda bist damit umgeh kaunnst,
und do hüfts da hoid a nix, wonnst a jedes moi wieda gleichvü raunzt.

Doch oamoi, wird’s passiern und da Knopf der geht da auf,
und bis durthi taucht so maunche Aufgob, no a etlichs moi auf.

I WA SO GEAN

An Tog laung war i gean a Vogel, gaunz a schräger,
und pfeifat oafoch auf ois wos ma aum Oasch geht.
Und hinterlossat ausn Flug übroi mein Dreck a,
auf ollem wos in dera Gegnd nua so steht.

I wa sogean moi an Tog Hypo Alpe Adria,
donn warn olle meine Sorgn delegiert.
Auf Millionen Österreicher und deren Kinder,
und ständig steckt ma wer wos zua gaunz ungeniert.

I wollt i warad an Tog laung amoi nur Ö3
donn wisst i endlich moi wos guade Musik is.
I schauat aun de Österreicher oafoch vorbei
und spü den söbn Scheiß wia olle, des is gwiss.

I warad a gaunz gern amoi de Heidi Klum,
donn wissat i endlich wos wahre Schönheit is.
I essat nix mea, trink aum Tog nur wossa, obnds Rum,
und hätt a Waage in der Toschn des is gwiss.

I war sogean moi an Tog laung da Karl Heinz Grasser,
weil er is jo da scheenste und er is legal
sei Frau verkaft Glas teuer, jo des is echt krass, ha,
und de Justiz is ihm vom Prinzip her egal.

I war sogean moi an Tog laung nur HC Strache,
und zwoa grod donn, wonn i wos hob vabockt.
I gabad aundre d’Schuid und schimpf und schwörad Rache
genau hoid donn, bevor da Söbstzweifel mi pockt.

I war goa net gern fia an Tog a Rettungsgasse,
a jeda kennt mi und trotzdem nimmt mi neamt ernst.
Oft brauchns mi, doch mochn nix, wie ich des hasse,
obwohl du heite scho im Fernsehn vo mir lernst.

I tät so gern a Wochn laung moi a BH sei,
mit Körbchengröße C zumindest, des wa schee,
i untastütze oda bändige und faung ei,
des war i gean, des werdn de meistn scho vasteh.

Aum ollaliabstn war i jedoch moi a Smartphone,
donn wuat i gstreichlt druckt und kitzelt jedn Tog.
Wonn i moi miad wia steckt ma mi gaunz schnö aun den Strom,
weil ohne mi heit fost koa Mensch mehr leben mog.

JAMMAST EH?

Die Kunst des Nörgelns hat in Österreich durchaus Tradition
auch wenn ma auf die Frog:  Wia gehts da? Meist sogn guad.
Jedoch das ABER, ja das lauert auch dahinter schon
der Nachsatz: Muass jo geh! Is a a oida Huat.

Doch wonn du glaubst, dass unzufrieden sei a Selbstläufer ist,
dann irrst du sehr, das muss man gut trainiern.
Und auch von heit auf morgen kannst des net, jo des is gewiss
des muass dei Lebensinhoit werden, des muass ma gspian.

Drum sing ma „Jammast Eh“ nur ois Erinnerung drau
net dass ma unobsichtlich moi darauf vagessn.
Doch meistns Ta-mas-eh, weil des bei uns fost jeda kau
oft tuan si Leut wia im Duell a damit messn.

Des wichtigste is bei der Vorbereitung von echtem Frust
dass der Wille nichts zu ändern sein muass stark
ganz gleich wieviele Angebote du dabei ablehnen musst
und dass die positive Sicht dich blenden mag.

Ganz hilfreich sind auch zwei Extremstandpunkte die es beweisen
dass es keine Lösungsmöglichkeiten gibt.
Und du musst jeden neuen Standpunkt als Phantasterei abweisen
auch wenn du dich dabei machst kurz unbeliebt.

Drum sing ma „Jammast Eh“ nur ois Erinnerung drau
net dass ma unobsichtlich moi darauf vagessn.
Doch meistns Ta-mas-eh, weil des bei uns fost jeda kau
oft tuan si Leut wia im Duell a damit messn.

Denn Lösungsmöglichkeiten sind der Feind der Unzufriedenheit
drum lass dich bitte erst gar nicht darauf ein.
Schon seit Jahrzehnten jammern wir, ein Privileg der Menschheit
für unsre Kinder solls doch auch noch so schön sein.

Denn Traditionen muss man fortsetzen, auch die ohne Sinn
einfach weils früher schon so war solls immer sein
auch wenn das Aufhörn oder Änder durchaus wär ein Gewinn
mit „Warum is des so?“ is man oft allein.

Drum sing ma „Jammast Eh“ nur ois Erinnerung drau
net dass ma unobsichtlich moi darauf vagessn.
Doch meistns Ta-mas-eh, weil des bei uns fost jeda kau
oft tuan si Leut wia im Duell a damit messn.

I tat gean aufhean kinna oba kaunn i nu net
des ewige gesuder is ma söba scho zbled.
Wos tat i nur stott raunzn do bleibt gaunz schee vü Zeit
i glaub i bin hoid nu net soweit.

Drum sing ma „Jammast Eh“ nur ois Erinnerung drau
net dass ma unobsichtlich moi darauf vagessn.
Doch meistns Ta-mas-eh, weil des bei uns fost jeda kau
oft tuan si Leut wia im Duell a damit messn.

I DRAH MI

Es kann mi nix überroschen, i hob jo scho olles gseng
hob mei Lebn in da Toschn und trotzdem is ois zweng
Woat jedn Tog auf d’Erlösung durch irgendwos, irgendwen
doch i woaß net auf wos genau, vielleicht hob i’s  übersegn?

I bin ma sicher irgendwonn is donn gaunz do, mei Glick
i hoff es kimmt net ois auf oamoi, net dass i dran dastick
Weil des Glick des soid kemma, gaunz alloa wia i’s wü
weil nur donn kaunn is nemma, mit an gaunz guadn Gfüh.

Und i drah mi, und i drah mi, und i drah mi im Kroas
moch scho wieda des gleiche, obwohl is längst bessa woaß
doch des bessa is a neich hoid und i kaunns nu net recht
doch i mochs jetzt moi aundas, oafoch weil i’s so mecht.

I hob scho oft überlegt, wia mei Glick ausschaun tat
wia a noglneichs Auto, wia a Tafel Schokolad
wia a büdhübsche Frau, volla Lebn, volla Freid,
so zoagns mas im TV, wia des Glick ausschaut heit.

Doch donn bin i , oafoch so nua, aufn Berg aufi gaunga
weil i sunst grod nix gwisst hob wos mit mir soid aufaunga
und wia i obn Steh in da Sunn, grins i plötzlich, gaunz froh
i hob jo nua a stickl geh braucht, und mei Glick woa donn do.

Und i drah mi, und i drah mi, und i drah mi im Kroas
moch scho wieda des gleiche, obwohl is längst bessa woaß
doch des bessa is a neich hoid und i kaunns nu net recht
doch i mochs jetzt moi aundas, oafoch weil i’s so mecht.

Und wonns kimmt, mochts koan Krocha, und es is net recht laut
und oft woasst es eascht nochher, wia des Glick echt ausschaut
Muasst den Comfortbereich valossn, und wos neiches riskiern
nimm moi a aundre Stroßn, faung au des Lebn gaunz gspian!

Und jetzt woaß i, jo jetzt woaß i, des Glick is bei mia
i muass jo nua hinschaun, mehr brauchts net dafia
oba sitzn und woatn, des lockts Glick hoid net au
und des glücklichsei hortn, mit dem faungst a nix au.

DE WÖT

Woasst, es mocht jetzt goa nix
wonn i aun di denk
und ah net, des is fix
dass i dia woa oft zweng

Und dass’d sogst, i woa nia do
wonnst mi donn moi hättst woin
genau donn was gscheit gwen,
hätt i a kinna soin.

Und woasst, die Wöt draht si weita,
a wonn si mia zwoa nimma drahn.
Es is gaunz sicha so gscheita,
bevor ma draufgaunga warn.

I woass net, warums so is kemma,
dass ma tau hom, wia ma tau hom, so laung
i wünsch uns, dass jetzt werdn kaun scheena,
vielleicht bring mas mit aundre gscheita zaum.

Und woasst, die Wöt draht si weita,
a wonn si mia zwoa nimma drahn.
Es is gaunz sicha so gscheita,
bevor ma draufgaunga warn.

Und hiatz werdn ma segn, wea ma san
wonn koa aundra uns obhoit vom leben,
wonn ma des wos uns taugt, endlich tan,
bleibt a wieda wos üba zum Gebn.

Und des Herz des geht auf volla Lochn
weils aum Liabstn nua Lochn tuan tat.
Und vo söba passian guade Sochn,
und des leben, des wiad nie mehr stad.

NEUJOAH

Wonn ma aum End vom Joah so zruckschaut, wiad ois klora,
eus wias de meiste Zeit im letztn Joah gwen is.
Wos d’gaunze Zeit scho woa gwen is wird nu vü wohra,
ma fühlt si gscheiter plötzlich, jo des is gewiss.

Drum lernst vielleicht draus, und mochst Vorsätz fia de nächste Zeit
Weu heit is ois so oafoch und so greifboa ah,
doch meistens hoidn de Ideen net laung, du kimmst net weit,
und ah im neichn Joah is maunchmoi wieda schwa.

So mauncher heat zum Rauchn auf und faungt zum Trinken au,
weil ma net ohne neichn Aufaung oafoch aufhean kau,
und oana setzt sei Frau vor d’Tür weil sie eam hot betrogn,
scho laung fehlt beidn scho des Gspür, sie haum si öfter belogn.

Drum lernst vielleicht draus, und mochst Vorsätz fia de nächste Zeit
Weu heit is ois so oafoch und so greifboa ah,
doch meistens hoidn de Ideen net laung, du kimmst net weit,
und ah im neichn Joah is maunchmoi wieda schwa.

Und jetzt is a de Zeit wo du de Wöt verändern wüst,
drum was aum bestn du faungs bei dir söba au.
Und schaust, dass ah wonns hoat wird di so guad wias geht bemühst,
weil ma gaunz sicha nua si söba ändern kau.

Drum suach da aus a Zü des vielleicht erreichn kannst,
Und sei geduldig mit der Wöt vor ollem mit dir.
Vergiß net drauf dass neben oabeitn du ah nu taunzt
Und leb de Leben voi, denn du bist gmocht dafür.

TRAU DI

Verändern is net imma leicht
weil do donn oft da Mut net reicht
Des wos ma kennan, kennama laung
beim Neichn wird uns aungst und baung.

Des oide tuad meist net vü weh
drum loss mas goa net recht gern geh
Weils neiche richtig gfährlich is
und wias wird, is net gewiss.

Trau di drüber, heast geh weita
bleda kauns net wean, nua gscheida
probias moi aundas eus bishea,
s’Leben hot fia di nu vü mehr.

Nua weu du glaubst du woasst wias geht
san de aundan net glei olle bled.
Es gibt vü mehr eusd denkn kaunsnt
gleich wiavü du drüber raunzt.

Dass deine Möglichkeiten san begrenzt,
dass du im Hamsterradl rennst
wonnst oiweu nua aum Bodn schaust
merkst net, dassd in Käfig söba baust

Trau di drüber, heast geh weita
bleda kauns net wean, nua gscheida
probias moi aundas eus bishea,
s’Leben hot fia di nu vü mehr

DENK DA WOSD MOGST

Neulich woa i recht sauer
woass goa nimma warum
des is nix auf die Dauer
des wird sogoa mir z’dumm

Doch i hob donn begriffn
dass is söba entscheid
hob aufs sauer sei pfiffn
do hob i mi recht gfreit

Denk da wosd mogst
oda plan sovüst wüst
übaleg net wost sogst
wanns di donn bessa fühlst

weil des leben geht weida
und is gressa oisd denkst
und des leben is gscheita
a wonnst aun dein Denkn hängst.

I woa ängstlich sehr häufig
wegn ollahaund Sochn
des woa mir sehr geläufig
und mia woa net zum Lochn

Doch des schräge aum Aungst hobn
is dassd des fiachst wos woa
oda des wos nu sei wird
des is nie JETZT, des is kloa.

Denk da wosd mogst
oda plan sovüst wüst
übaleg net wost sogst
wanns di donn bessa fühlst

weil des leben geht weida
und is gressa oisd denkst
und des leben is gscheita
a wonnst aun dein Denkn hängst.

Und die Wiesn is grea
und da Hümme is blau
in da Nocht is ois schwoaz,
drum woas i’s net so genau

und wia grün fia di ausschaut
oda rot oda blau
des wead i nia erfoahn
gaunz egal, wia i schau

Denk da wosd mogst
oda plan sovüst wüst
übaleg net wost sogst
wanns di donn bessa fühlst

weil des leben geht weida
und is gressa oisd denkst
und des leben is gscheita
a wonnst aun dein Denkn hängst.

Und wonnst den Herrgott oda d’Frau Gott
zum lochn bringa wüst
moch an Plan fia die leben
wonsst di donn bessa fühlst.

Weil erstns kimmts aundas
und zweitns oisd denkst
und oft is wia aum Glotteis,
es is gleich wohinnst lenkst.

Hauptsoch du bleibst in Bewegung
und schaust oafoch, wos kimmt.
Ohne zvü überlegung
du schoffst des, gaunz bestimmt.

Wos bei oan scho laung aus is
faungt a aundra eascht au
mia san net gleich, des is gwiss
hauptsoch du bleibst nu drau.

Denk da wosd mogst
oda plan sovüst wüst
übaleg net wost sogst
wanns di donn bessa fühlst

weil des leben geht weida
und is gressa oisd denkst
und des leben is gscheita
a wonnst aun dein Denkn hängst.

ES IS ZEIT

De Wöt is laut
oft z’laut fia mi
dass mi fost umhaut
hob i donn des Gfüh

Und donn glaub i oft
i muass do oiweu mit
maunchmoi hob i ghofft
i moch eh scho größere Schritt

Es
is
Es is Zeit fia mi

Gaunz gleich wia wüd
jetzt draußt geht’s zua
i hob mi bemüht
doch i brauch jetzt mei Ruah

I kaun wos i kaunn
und vü kaunn i net
faung öfta moi wos aun
heas auf, und es is ma net zbled

Es
is
Es is Zeit fia mi

I moch de Haustia zua
und de Augen donn
fia heit hob i scho Lärm gnua,
und i alloa entscheid wonn.

Jo sowos gönn i ma,
is mei Geschenk aun mi
i wünsch eich des a
es hüft, dass i zfriedn bi.

Es
is
Es is Zeit fia mi